O Miradoiro do Duque, sobre o Canón do río Sil permite visibilizar unha ampla zona da Ribeira Sacra a ambos lados, xusto enriba do embarcadoiro da Deputación. As instalacións do miradoiro foron obxecto de ampliación e mellora, cun orzamento de 50.892 euros, procedentes de fondos municipais e do GDR Ribeira Sacra Courel.

Dotouse dun deseño máis actual, ampliando as zonas onde se pode contemplar a paisaxe e aumentando a súa lonxitude no plano horizontal da súa pendente na ribeira do Sil, de xeito que os puntos de observación gañan altura sobre o terreo escarpado aumentado a sensación de baleiro e o seu atractivo.

Tamén se aumentou a capacidade de acollida para grupos de visitantes, executándose un novo miradoiro con dúas zonas que se estenden sobre a actual pendente da ladeira dende onde se pode contemplar mellor a paisaxe.

Colocouse un panel informativoe instaláronse dous bancos, con asento a dúas caras, executados co mesmo entaboado de madeira tratada que o pavimento do miradoiro.

Segundo José Tomé, “o Miradoiro do Duque é dende hoxe un novo miradoiro, e polo tanto, un referente de obrigada visita para o turismo na Ribeira Sacra”.