Iago Fernández é un neno que vive engaiolado coa maxia e contábanos, nunha entrevista que lle fixemos en agosto, que dende os tres anos ten un especial interese polo tema, acudindo a canta actuación hai, e non só na contorna de Monforte, senón que ten realizado cos seus pais desprazamentos a nivel nacional e internacional para ver algún mago concreto.
Tras a súa participación nun concurso de talentos en Sarria no entroido, Roberto Lolo, coordinador do festival de maxia, como premio convidouno a participar na gala final deste evento que tivo lugar o día 25 de agosto. O caso é que foi todo unha sorpresa, non estando anunciado na programación, e causou sensación ver a un cativo tan pequeno facendo algúns números de maxia xunto a grandes artistas do oficio.
A partir de aquí outros medios de prensa, como foi o caso de El Progreso, interesáronse pola súa historia. Este medio de comunicación dedicoulle un completo artigo a raíz da súa participación nas festas de Paradela, actuación na que congregou arriba de cen espectadores.
Este venres 1 de novembro estará no Luar, no programa máis popular da Televisión de Galicia. Iago Fernández, segundo nos di seu pai, “vén contentísimo, ofrecéronnos vir e como Iago non di que non pois aquí estamos”.
