O último venres de novembro comeza o XI Concurso de Tapas da Pobra do Brollón. Este ano participan sete establecementos; catro bares na capitalidade, dous en Salcedo e un en Cereixa. ‘Trátase dunha iniciativa xa consolidada no noso concello que permite dinamizar a hostalaría guímara animando a veciños e visitantes a participar coas súas votacións,’ comenta Mónica Rodríguez, a concelleira de eventos.

O xurado popular elixirá as mellores tapas para a entrega do primeiro, segundo e terceiro premio. Valorarase positivamente na decisión dos premios a promoción de viños da Ribeira Sacra.

Entre todos os que votaran sortearase un agasallo que consistirá nun circuíto termal e unha noite para dúas persoas no Hotel Oca Augas Santas de Ferreira de Pantón. A entrega de premios e do agasallo realizarase o día 5 de xaneiro na Casa da Cultura ‘Olga Novo’ dentro dos actos dos Reis.