O Presidente da Deputación de Lugo, José Tomé, vén de asinar un convenio de colaboración co Alcalde do Saviñao, Juan Carlos Armesto, a través do que a institución provincial destina 182.000 euros á dotación dunha rede de abastecemento que permitirá, ao cento de veciños e veciñas da parroquia de Santa María de Marrube, contar con auga corrente.

O Concello do Saviñao comprometeuse a executar o investimento antes do 31 de agosto do 2020 e encargarase das memorias técnicas, aportar os terreos precisos, permisos e autorizacións obrigatorias para efectuar os traballos.

E a Xunta de Goberno da Deputación vén de aprobar a adxudicación das obras de mellora do firme da estrada que une Monforte de Lemos coa Pobra do Brollón por un importe de 264.000€.  

Os traballos desenvolveranse en preto de 7,5 quilómetros no treito que une Monforte con Vilachá-Rozabales, seguindo un itinerario en forma de T. En concreto, na LU-P-3203, melloraranse 6 quilómetros, entre os puntos 6,030 e 11,997. Ademais, farase outra intervención na LU-P-4702, entre Vilachá e a Estación da Pobra do Brollón. Neste caso, é un quilómetro e medio, entre os puntos 1 e 2,4.

As obras teñen un prazo de execución de 6 meses e consistirán na reapertura e limpeza de cunetas, a mellora do drenaxe da vía para garantir a súa maior durabilidade, a pavimentación e a sinalización horizontal.