O paro castigou a comarca de Chantada o pasado mes de decembro

No lado positivo salientar a redución moderada do desemprego nas comarcas de Sarria, Lemos e Quiroga.

Oficina do INEM de Monforte / XdL

Os datos referidos á contratación no derradeiro mes do 2019 nas comarcas que cubre este xornal foron bos, aínda que sempre se espera máis tendo en conta o tirón comercial que se espera sempre do Nadal.

Contabilizando o total dos datos das comarcas de Sarria, Lemos, Chantada e Quiroga, o saldo reflicte unha redución do paro en 64 persoas. Agás Chantada, o resto de comarcas viron como baixaba o número de desempregados/as.

Os números do desemprego por comarcas quedan así: na comarca de Lemos abandoaron a condición de parados/as 20 persoas, quedando cun total de 1577; a comarca de Quiroga baixa en 27 e queda con 285 parados/as; en Sarria atoparon traballo 29 persoas e quedan con 1096 e Chantada aumenta en 12 persoas quedando con 612.

Por concellos, o desglose queda do seguinte xeito:

Na comarca de Quiroga, unha das que ofrece mellores resultados, Ribas de Sil queda con 56 desempregados/as (-6), Folgoso do Courel con 50 (-5) e Quiroga con 179 (-16).

Na demarcación de Lemos, Bóveda queda con 58 (+2), Pantón con 94 (+4), A Pobra do Brollón 74 (+3), O Saviñao 156 (-2), Sober 110 (+2) e Monforte 1085 (-29).

En Chantada, a peor parada neste pasado mes de decembro, Taboada contabiliza 95 desempregados/as (-2), Carballedo 66 (+2), e Chantada 451 (+12).

Na comarca de Sarria, O Incio queda con 46 anotados/as no paro (-8), Láncara con 113 (-4), Paradela 43 (+4), O Páramo non sofre variación, Samos 36 (-7), Triacastela 32 (+3), e Sarria 790 (-17).

Dende o sindicato CC.OO. fan unha lectura moderadamente optimista destes datos do paro. Insisten na precariedade, referindo que 9 de cada 10 contratos foron temporais, e láianse de que moitos deles, a maioría do sector servizos, rematarán despois de Reis.

Aproveitando o proceso de formación de Goberno a nivel nacional esperan que este derogue os aspectos máis lesivos da reforma laboral que tanto dano está a facer aos traballadores e traballadoras.

DEIXAR UN COMENTARIO

Please enter your comment!
Please enter your name here