O delegado territorial de Lugo, José Manuel Balseiro, mantivo unha xuntanza coa afectada, Emilia Beceiro, para explicarlle as opcións que ofrece o Goberno galego aos damnificados por sinistros semellantes, dunha banda facilitándolles unha nova vivenda, se así o desexan, e doutra achegando financiamento para a rehabilitación da súa residencia habitual a través de diversos programas de axuda.

A afectada optou por acceder en réxime de alugueiro a unha vivenda de promoción pública situada na rúa Benito Vicetto, moi preto do seu anterior domicilio. A casa conta con tres dormitorios e 82 metros cadrados, e a adxudicación é directa, unha circunstancia excepcional que se reserva para causas extraordinarias.

En días pasados, o delegado e técnicos do Instituto Galego da Vivenda e Solo (IGVS)  reuníronse tamén coas persoas que resultaron damnificadas por senllos incendios nas súas casas en Carballedo e Folgoso do Courel (a finais de decembro). Neste último caso  manifestaron a súa preferencia polo bono alugueiro.

O IGVS, que depende da Consellería de Medio Ambiente, Territorio e Vivenda, ofrece aos propietarios o acceso a unha vivenda en adxudicación directa ou ben ao bono alugueiro. Igualmente, informa das liñas de axuda á rehabilitación que se convocan periodicamente.