Un dos portavoces da Plataforma, Javier Pico, precisou que pretenden que a Xunta ofreza información porque entenden que se “mentiu e ocultou información” por parte da Consellería sobre estas obras no centro, que motivaron que os pais non enviasen aos seus fillos a clases durante un par de semanas.
Tamén asegurou que a “principal reclamación é un colexio novo porque o Frei Luís de Granada presenta problemas estruturais. Así o din os informes da Xunta, con formigóns de mala calidade e non pode ser que a Xunta siga con parches neste colexio desde 2011”.
En canto á Escola Fogar, Pico sinalou que “para os nenos é moi incómodo, son aulas pequeniñas. O meu fillo dime que para saír da aula ten que saír de lado porque se sae de fronte dáse coas cadeiras”.
O portavoz desta plataforma constatou que desde que se reiniciaron as clases na Escola Fogar, fai un par de semanas, “producíronse problemas de pingueiras. Non é unha situación ideal para que os nosos fillos reciban educación aí, necesitamos aulas en condicións e esiximos tanto ao Concello de Sarria como á Xunta solucionar esta situación.
