Homesociedade"A xente pide que lle leven as viñas para que non queden...

“A xente pide que lle leven as viñas para que non queden abandonadas”, Héctor Ferreiro, adegueiro

"Quedarán as zonas boas de viñedo nas que haxa servizos para acceder aos sitios, se non hai servizos non se pode acceder ás viñas e van quedar abandonadas, porque a xente maior xa non pode e relevo xeracional non hai." Héctor Ferreiro da adega CastroFiz fai balance da estrea da adega na Feira do Viño de Chantada e de como ve o sector.

Publicado o

- Advertisement -

Héctor Ferreiro Abelairas de Taboada e José Luis Fernández Pedreira de Chantada puxeron en marcha no 2017 a adega CastroFiz, na zubzona de Chantada. Este ano, por primeira vez, acudían á Feira do Viño de Chantada, cita que valoran como un éxito. Falamos da experiencia da adega despois de 3 anos e con Ribeira Sacra pendente de ser declarada Patrimonio da Humanidade, cun Héctor afónico, despois de 3 días de Feira do Viño, “Tanta xente, a música e todo o tempo falando dos viños, claro, a garganta resíntese”, sinala.

Ademais da afonía, que sensación vos deixa a primeira asistencia á Feira do Viño de Chantada?

En xeral moi contentos todos, creo que tivemos unha boa acollida; sobre todo, tendo en conta que a maioría da xente non nos coñecía. A xente que o probou dicíanos que lles recordaba ao viño de sempre das ribeiras do Miño. A maioría da xente dicía que lles gustaba moito. A Feira é bastante cedo, creo que para estar perfecto o viño necesita máis tempo de botella. Cara abril, maio, aínda estará mellor.

Botella CastroFiz / Héctor Ferreiro

A estrea na Feira fixéstela con premio, CastroFiz Barrica 17 levou o segundo premio da categoría outras anadas da cata oficial da Feira do Viño.

Este viño é o primeiro barrica que facemos e está resultando unha grata sorpresa, xa tivo premio en Aosta o ano pasado, medalla de ouro no Mondial des Vins Extremes. Parece que a forma de elaborar o barrica e as variedades que nós temos de Garnacha, Grao Negro, Mencía e Sousón maridan moi ben coa madeira.

Feira do Viño de Chantada / XdL

Onte están as viñas de CastroFiz?

En San Fiz, en Chantada no Castro da Arribada, ladeira sur cara o Asma, cun terreo de granito e lousa; en Sobrecedo (Taboada), aquí é lousa e lousa, e cepas vellas das distintas variedades. En Chantada estamos recuperando cepas vellas e prantando cepas novas de Sousón e Mencía. Pero onde máis viñedo temos é en Castelo (Taboada). Aquí estamos traballando o branco,… Godello, Treixadura, Branco Lexítimo e Dona Branca. Estamos con probas para ver o tipo de elaboración que se asocia máis ao noso tipo de uva. Fixemos unha elaboración artesanal este ano para probar, fermentación no seu propio bagazo sen prensar. O primeiro é chegar a un equilibrio que nos guste a nós e despois empezalo a vender.

Case 3 hectáreas de viñedo, para que produción?

Do CastroFiz facemos 3.300 botellas, do barrica 800 e serán 800 de branco. O ano pasado sacamos unha liña a maiores, CastroFiz tradición, viño fermentado en madeira de roble francés, non é barrica nin é do ano; estamos probando, sacamos 1.500 botellas. Chamámoslle tradición porque recupera as técnicas de antes do viño en madeira e a fermentación en madeira.

Viñas CastroFiz Chantada / Héctor Ferreiro

Como comeza a adega CastroFiz?

Eu sempre fun un namorado da viña e da ribeira, gran defensor do viño do Miño, así, fresco. Sempre fun namorado da zona e facía viño para autoconsumo. Meu socio é un dos meus mellores amigos de sempre; nas xuntanzas falabamos de encaixar pezas porque el é un entusiasta do viño e goza co viño e a min gústame a elaboración. Fóronse mercando viñas, recuperando outras. Vimos que podiamos encaixar coa filosofía de viticultura que temos, que é recuperar o de antes facéndoo o mellor posible. Entre o que se comprou e o que recuperei do que tiña, xuntamos 3 hectáreas e parece que á xente lle comeza a gustar, veñen restauradores da costa, sobre todo, que lles gusta o viño e as elaboracións que facemos… Aí estamos, a ver a onde imos parar. Temos a intención de en 3, 4 anos chegar a unhas 22.000 – 25.000 botellas. Pero, sobre todo, queremos traballar a calidade, é prioritario frente á cantidade; traballar a calidade e experimentar para seguir mellorando.

Como ves o sector do viño na Ribeira Sacra?

Estase mellorando moito a nivel colectivo, as elaboracións do viños son mellores. Pero creo que temos dúas circunstancias, que segundo como se aproveiten poden ser debilidades ou oportunidades, o envellecemento de moitos propietarios de viñas con falta de relevo xeracional e necesítase profesionalizar máis o traballo na viña. Falo, por exemplo, de ciclos formativos xa non só para persoal técnico, senón para profesionais que lles guste a viña e saiban traballala nas distintas fases, e que iso reflicta no seu salario. Tampouco se pode pretender traballar unha viña e pagar pouco, sería importante ter a xente nova contenta con salarios dignos. Facer cooperativas de servizos, que a xente se forme, e a cooperativa podería defender mellor os salarios.

Viñas CastroFiz Taboada / Héctor Ferreiro

E pendentes da declaración de Patrimonio da Humanidade…

Para mín chégase aquí principalmente, porque hai estas viñas; pero sabes canta xente me dí: por favor lévame estas viñas, que se non quedan abandonadas. Entón, falta persoal cualificado de servizos para que esas viñas non se abandonen, ou podémonos quedar sen o viñedo, que é o máis especial deste Patrominio da Humanidade. Quedarán as zonas boas de viñedo nas que haxa servizos para acceder aos sitios. se non hai servizos non se pode acceder ás viñas e van quedar abandonadas, porque a xente maior xa non pode e relevo xeracional non hai. Con 42 anos son dos máis novos que estamos no tema da viña. É preocupante. Política e veciñanza deberían ir da man neste tema, ou en 10 – 15 anos esto vai a ser un pao moi grande porque se abandonarán moitas viñas boas.

ÚLTIMAS

O Courel protesta pola ausencia de médicos

As protestas repetiranse o vindeiro mércores e ata que se solucione a situación, segundo...

Escultura en madeira con motoserra no IES A Pinguela

Eugenio Linares, asturiano e veciño de Tuiriz, no Concello de Pantón, realizou hai uns...

Diversidade e conciliación camiñando polos miradoiros de Sober

Redes Lilas agrupou a unhas 40 mulleres nunha andaina a través dos miradoiros do...

Esperta Monforte leva a pleno ampliar e mellorar a Biblioteca adquirindo o edificio da galería Sargadelos

Esperta Monforte considera que as instalacións da casa da cultura, e en particular da...