A empresa monfortina Piensos Senra S.L., vén de entregar ao Hospital Comarcal de Monforte de Lemos este sábado, 21 de marzo, material de protección contra o coronavirus. A empresa fixo entrega de batas e gafas desbotabeis, que axudarán neste momento de crise sanitaria no que se evidencia a falta deste tipo de medios na sanidade.
Piensos Senra, a empresa da que ata hai uns meses era presidenta do Centro Comercial Urbano de Monforte, conta con máis de 20 anos de traxectoria na distribución de pensos para animais.
Nun sector similar móvese Comercial Mida, a empresa de Taboada, tamén no sur de Lugo, que hai uns meses se daba a coñecer pola grande cantidade de máscaras sanitarias que exportou, sobre todo a China. Hoxe a empresa de Taboada concentra a súa actividade na alimentación de animais, as máscaras desapareceron hai unha semana e con elas, xeles, guantes e outro material. “O que quede será intervido polo goberno tal e como anunciou,” sinalan desde Comercial Mida.
Varias empresas de subministración do sector primario están desenvolvendo unha importante colaboración nesta situación de crise. Así, como xa publicou Xornal de Lemos, o concello de Sober xestionou coa empresa local PulviPlass Ibérica, a entrega gratuíta de sulfatadoras de alta presión con máscara protectora para entregar en todos os Concellos da Ribeira Sacra.
