Os viños da D.O. Ribeira Sacra están a ser os viños galegos que máis se venden nos supermercados, pero a incerteza chega coas limitacións no sector da hostalería, o tempo que bares e restaurantes permanecerán pechados; e como se fará a súa reapertura. Nesta situación as adegas da D.O. Ribeira Sacra dispoñen de medios para poder seguir vendendo viño, ben a través da súa web ou por comercio electrónico; e tamén hai adegas que realizan envíos a pedidos telefónicos ou a través de correo electrónico.
Na páxina web do C.R.D.O.R.S. cóntase coas adegas clasificadas por subzonas onde se ofrecen os distintos contactos das mesmas e un buscador que levaría ao visitante á adega escollida, para desde alí poder coñecer como solicitar ese viño. “Consumir nestes momentos, máis que nunca, os nosos propios produtos é fundamental. Facemos un chamamento ao consumidor a que aposte polos viños galegos con D.O., sectores próximos que debemos apoiar entre todos para que repercuta no ben de todo,” sinalan desde a D.O. Ribeira Sacra.
Xa que non todas as adegas dispoñen de moitos servizos online e si teñen interese en poder chegar ao cliente, desde o C.R.D.O.R.S. publican na web un listado das adegas que comunicaron o seu interese en vender viño e o modo de adquirilo en cada caso. Esta información irase actualizando diariamente de modo que as persoas interesadas en beber un Ribeira Sacra poidan acceder a el facilmente.
