Os nenos de Quiroga de entre os 3 e os 13 anos reciben nos seus domicilios entre onte e hoxe, 30 de abril, as súas máscaras reutilizables. O concello comprou a tela para a realización de preto de duascentas máscaras reutilizables que foron confeccionadas por traballadores municipais en dous tamaños diferentes. Se no momento do reparto que se fará persoalmente non se atopan ninguén na vivenda, poderán achegarse a recollelas na casa consistorial a partir do luns.
En Quiroga xa se fixera un primeiro reparto de máscaras aos maiores de 70 anos e persoas con patoloxías por ser as máis vulnerables. Persoal municipal desprazouse a todos os núcleos do rural para entregar as máscaras, cubríndose a práctica totalidade dos veciños do rural, segundo sinalan desde o concello.
Os veciños da vila de Quiroga poden achegarse pola casa consistorial onde lles entregarán a través da ventá da fachada principal as súas máscaras. Dende o concello de Quiroga apelan á responsabilidade dos veciños para que aproveiten as saídas aos supermercados ou farmacias para recoller as mascaras” e que non saian a buscalas expresamente.
Aínda que nestes momentos no municipio non hai ningún caso positivo de Covid-19, o concello segue cos traballos de desinfección nas rúas e núcleos de poboación e especialmente naquelas zonas de máis tránsito das persoas.
Axudas estudantes
As axudas para estudantes que o concello convocou no pasado mes de decembro, cunha partida de 5.000 €, ían dirixidas a estudantes universitarios e de Formación Profesional empadroados en Quiroga.
Para ter dereito a estas axudas os estudantes tiñan que ser ademais dependentes economicamente (menores de 25 anos que conviviran no domicilio familiar antes do inicio do curso escolar e que non conten cun contrato de traballo). As axudas contemplan a matrícula do centro educativo, a adquisición de libros de texto ou material escolar e os gastos de transporte; sempre que se presente a documentación que os xustifique.
A falta de xustificación destes gastos foi a documentación que non se presentou nalgunha das trinta solicitudes recibidas, polo que a Comisión Avaliadora notificará por escrito a cada caso, a documentación que deberán presentar e o prazo que terán para facelo, un prazo suficientemente amplo para permitirlles a entrega dos xustificantes de pago neste momento de crise sanitaria.
