En decembro de 2019 coñeciamos, grazas a unha entrevista de Xornal de Lemos, detalles da vida de Rafa Aguiar, un apaixonado da comunicación e da música que chegou a Monforte de Lemos hai 35 anos.
Dende aquela Rafa fixo radio local e entregouse á comunicación de proximidade gañándose a simpatía de moitos monfortinos e monfortinas. Levaba 25 anos traballando en Radio Principal Cadena Ser, emisora que contou con excelentes profesionais como a coñecida xornalista Manola Porto -en Onda Cero Monforte dende o 2015-, ata que no día de onte anunciaba o seu fin como traballador desta empresa.
Rafa Aguiar fixo un breve comunicado no Facebook e as reaccións non se fixeron esperar. En menos de dúas horas tiña xa preto de 100 comentarios nos que monfortinas e monfortinos trasladábanlle o seu apoio. Moitos deles tamén se pronunciaron a favor da súa valía profesional e sinalaban que Radio Principal quedaba sen un dos seus referentes.
Contactamos con Aguiar pero díxonos que non era o momento para falar de detalles, que chegou o desenlace a unha relación profesional que xa non atravesaba polo seu mellor momento e que agora tocaba mirar para adiante.
