Sarria acollerá o Día da Galicia Mártir para lembrar os “mártires” que morreron pola Democracia

Foto de grupo de guerrilleiros, data descoñecida. Están dous dos participantes na "batalla de Repil", Guillermo Morán e "Roces" / Arquivo de Xurxo Ayán

A Vicepresidencia da Deputación de Lugo pretende institucionalizar o Día da Galicia Martir con actos programados para este luns a partir das 20:00 horas na Vila de Sarria; unha ofrenda floral e unha conferencia do historiador Rafael García, na Casa da Cultura dese municipio, ademais da actuación do grupo Raiceira que amenizará o evento.

O deputado de Memoria Histórica da Deputación de Lugo, o nacionalista Efrén Castro, en declaracións a Europa Press, sinalou que o que pretenden é “que este día estea institucionalizado” para falar “un pouco de memoria histórica”. Así, dixo que quere que “en toda Galicia” se aproveite este día para falar deses “mártires que tanto fixeron porque vivamos nunha democracia”.

O evento, a partir das 20:00 horas, será “íntimo” e tentando cumprir “o obxectivo de divulgar o que pasou nese tempo”, ademais de “contar a historia como foi”, sinalou Efrén Castro, nun “acto moi bonito”.

Estaba previsto que todos os actos foran no murallón de Santa Mariña, pero só será alí a ofrenda floral, xa que o resto trasládase pola metereoloxía adversa á Casa da Cultura, onde se manterá “a distancia de seguridade”, como comentou o deputado provincial.

Para Efrén Castro quedan “moitas accións por desenvolver” xa que, comentou, “hai moitos corpos aínda nas cunetas” e moitas “medallas e recoñecementos institucionais de asasinos que hai que retirar”. “Hai que contar ben a historia”, sentenciou e empezar a “compensar os agravios sufridos”, concluíu.

DEIXAR UN COMENTARIO

Please enter your comment!
Please enter your name here