A utilización destes soportes estará aberta a toda a cidadanía, centrando nestes puntos toda a publicidade ou información que se xere no municipio. As persoas que queiran utilizalos soamente terán que entregar os seus carteis na Casa da Cultura, para que sexa o persoal deste departamento o que se encargue da súa colocación.

Todos estes carteis colocábanse ata o de agora nas fachadas, principalmente de bares e cafeterías, polo que a  partir de agora eliminarase o impacto visual que isto ocasionaba. O Concello de Quiroga quere que non haxa carteis de publicidade fora destes soportes e que se convertan en puntos de referencia para a cidadanía.

As zonas elixidas  para instalar estes soportes publicitarios foron tres dos puntos máis concorridos da vila: na rúa Real, á altura  da Praza España e á altura da Casa Consistorial, e nas inmediacións do Centro de Saúde.

Os  Mupis quedan totalmente integrados co mobiliario urbano da vila xa que a súa estrutura está realizada en aceiro pintado da mesma cor que as papeleiras e xardineiras das beirarrúas. Estes soportes terán función bifacial polo que se poderá poñer información impresa, protexida por planchas de policarbonato, polas dúas caras.