A provincia de Lugo conta con 920 casos activos por Covid19, 123 casos máis ca onte. Deles 61 están en hospitalización, 1 na Mariña e 2 no Hospital comarcal de Monforte, trátase de usuarios da residencia do Incio; 17 no Polusa e o resto no HULA, centro que conta con 4 pacientes de coronavirus na UCI. 855 casos están confinados no seu domicilio.
Na provincia lévanse producido 54 falecementos por Covid19, 16 deles nas últimas dúas semanas en usuarios da residencia do Incio. Os casos totais na provincia entre altas e falecementos suman 2.576.
Mentres Sanidade dá por “controlado e estabilizado” o gromo de Monforte e o de Pantón. Nos últimos días houbo 3 casos positivos nas PCR feitas no Hospital de Monforte.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 4.364 deles 1.424 son da área da Coruña, 920 da de Lugo, 462 da de Ourense, 379 da de Pontevedra, 344 da área de Vigo, 659 da de Santiago, e 176 da de Ferrol.
Do total de pacientes positivos, 25 están en UCI, 181 en unidades de hospitalización e 4.158 no domicilio. Polo de agora, en Galicia hai un total de 14.158 persoas curadas, rexistrándose 668 falecementos. As dúas últimas persoas falecidas en centros hospitalarios foron dous homes de 81 e 71 anos que estaban ingresados no CHUS e no HULA, respectivamente. Ambos presentaban patoloxías previas.
