As obras do miradoiro teñen un prazo de execución dun mes, están sufragadas polo Concello e a Xunta de Galicia e consisten na instalación dunha pasarela que permitirá ver o meandro, ademais dun panel interpretativo e da adaptación do camiño de acceso. 

“A actuación será integral. Volaremos máis de 20 metros”, apunta o alcalde, Carlos Armesto, quen explica que este enclave natural recibe moitos visitantes pero “non esta nas condicións óptimas”; de aí, di, que “deamos este paso para por en valor o noso patrimonio natural como elemento dinamizador tamén da economía local”. 

Lugar único en Galicia

O miradoiro do Cabo do Mundo está situado na aldea de San Martiño da Cova. Dende este punto, pódese contemplar a espectacular panorámica que forman as bancadas en desnivel e as crestas das abruptas montañas típicas da Ribeira Sacra. É unha península que fai que a conca do Miño teña que formar unha pechada curva, conformando unha paisaxe salvaxe formada por viñedos, campos de cultivo, soutos de castiñeiros, construcións de estilo románico, etc.