O rexedor de Monforte, concello que este xoves, 22 de outubro, pasou á fase ‘vermella’ no mapa por concellos da Xunta, sostivo que a situación “non é preocupante” e lembrou que nos pasados meses chegou a haber máis de 120 casos. “Por tanto, estamos lonxe desa situación”, indicou.

Tomé sinalou que “parece que se coñece” a orixe “dos focos” e que estes teñen “unha forte ligazón co brote da residencia de Bóveda“. O rexedor tamén confirmou a existencia dun caso positivo entre os traballadores do Servizo de Axuda a Domicilio e informou de que a persoa afectada está illada e que ao resto dos traballadores fíxoselle probas PCR, cuxos resultados esperan.

Aínda que o alcalde si recoñeceu que a situación debe “preocupar e ocupar” considerou que é “moito mellor” da que houbo cando no concello rexistráronse máis de 100 casos e un edificio enteiro da rúa Duquesa de Alba foi confinado.