O alcalde de Sarria, Claudio Garrido, lamentou que o seu gabinete decatouse pola prensa de que o municipio entrou nas últimas horas no nivel vermello de alerta como consecuencia dos contaxios por coronavirus detectados nas dúas últimas semanas.

“Non temos noticias das autoridades sanitarias”, dixo Garrido, quen indicou que o Goberno local “pouco máis sabe” do anunciado polos medios de comunicación. Nese sentido, o alcalde afirmou que descoñece a extensión dos brotes detectados no municipio, o número de persoas afectadas, se se circunscriben ao ámbito familiar ou se están localizados. “Non temos nin idea”, dixo Garrido, quen expresou a súa esperanza en recibir máis información por parte das autoridades sanitarias durante a xornada.

O alcalde confirmou que o xefe da Policía Local de Sarria deu positivo por coronavirus, de modo que se lle fixeron probas PCR a “os axentes que estiveron en contacto con el”, pero sinalou que “deron -un resultado- negativo”.