O delegado territorial da Xunta en Lugo, Javier Arias, e o alcalde, Manuel Mato, formalizaron este martes a entrega ao concello da nova infraestrutura que distribúe a auga potable aos veciños e veciñas de Pacios, A Tellada, Parrocha, As Cortes, Vilachá e Loio.

A captación sitúase no río Loio. Existía un depósito de cabeceira con capacidade de 200 metros cúbicos e un pozo de bombeo da captación á beira do río; para poñelos en funcionamento foi preciso incorporar elementos como a arqueta de toma, as bombas coa súa valvulería no pozo, as instalacións de potabilización e a acometida eléctrica.

Tamén se executou a rede, de tipo ramificado, composta por un colector principal de máis de 5 quilómetros de lonxitude e os ramais secundarios. A estación de tratamento de auga potable (ETAP) construíuse nun edificio encostado ao depósito.

Estas obras, cun orzamento de máis de 259.000 euros, requiriron da execución doutros dous proxectos complementarios de mellora do sistema eléctrico. O primeiro, cun investimento de 48.000 euros, para adaptar a acometida eléctrica en baixa tensión dende o bombeo da captación no río Loio ata a ETAP. E o segundo, cun orzamento de 48.200 euros, para adecuar o transformador e a liña eléctrica soterrada de xeito que soportara o incremento de consumo que supuxo a introdución de bombas, filtros e outros equipos.

Arias sinalou que a Consellería, a través de Augas de Galicia, achega apoio técnico e financeiro aos municipios para que estes poidan prestar de xeito eficaz os servizos de saneamento e abastecemento, que son de competencia local.