O Concello de Monforte de Lemos tivo coñecemento rematando 2020 de que moitos monfortinos e monfortinas están a recibir unha mensaxe nos seus móbiles na que se lles notifica “un posible recibo do Concello de Monforte” con cargo á súa conta e “en base a recibos anteriores”, indicando incluso unha data concreta de cargo do mencionado recibo. Inmediatamente fixo chegar un comunicado informando a monfortinas e monfortinos de que dita información é totalmente falsa.

Lembran tamén que dende o concello non se utilizan este tipo de canles informativas para o envío deste tipo de mensaxes en relación coa notificación de recibos nin de cobros aos cidadáns monfortinos, polo que lle trasladan a todas aquelas persoas que recibiran ou poidan recibir unha mensaxe deste tipo, que non lle fagan caso algún, xa que con total seguridade trátase dunha “fake new” (noticia falsa).

Diante desta situación de certa alarma poñerán en coñecemento do departamento de delitos cibernéticos da autoridade competente estes feitos a fin de pescudar a orixe destas mensaxes falsas e actuar en consecuencia sobre os autores da mesma.