Ás seis da tarde, partindo das inmediacións da Residencia da Terceira Idade recorrerán a rúa Real. Nesta ocasión non irán nas súas tradicionais carrozas, pero si o farán nuns orixinais coches descapotables.
A comitiva pasará amodo para que todos os nenos que agarden nas beirarrúas, gardando a distancia de seguridade na medida do posible, os poidan ver. Ademais irán acompañados de tres paxes, un por cada rei, que provistos de guantes e utilizando continuamente xel desinfectante, entregaranlles a cada neno e nena unha bolsa de lambetadas.
Melchor, Gaspar e Baltasar, antes da cabalgata, terán tempo para entregarlle agasallos aos nenos máis desfavorecidos do municipio, e de achegarse ata o Centro de Día e a Residencia da Terceira Idade, onde saudarán dende fóra aos residentes, posto que o protocolo anti-covid restrinxe a entrada nestes centros de maiores.
Ademais de ver aos tres Magos de Oriente os nenos quirogueses terán a oportunidade de facerlles chegar as súas cartas de peticións a través do buzón real, que está instalado dende o sábado ata o luns no Pavillón Municipal, coincidindo coa festa infantil con inchables e pista de patinaxe.