Suspéndese o prazo de presentación de ofertas no contrato de transporte escolar para analizar as alegacións

O conselleiro Román Rodríguez reuniuse este luns, 11 de xaneiro coa alcaldesa de Folgoso do Courel, Lola Castro, para informala persoalmente deste asunto. Como indica a resolución, dado que os aspectos “postos de manifesto polos interesados poden ter transcendencia no desenvolvemento do proceso de adxudicación e na execución posterior do contrato, é preciso a súa avaliación e comprobación polos servizos técnicos da Consellería”, para o que é necesario paralizar os prazos. O obxectivo, segundo a Xunta, é ofrecer o mellor servizo nun contrato que estará en vigor nos dous próximos cursos, prorrogable por dous máis.

Unha vez determinado o alcance destas rectificacións, procederase a reanudar ou prorrogar os prazos iniciais de presentación de ofertas ou, no seu caso, retrotraer o expediente ao momento da aprobación dos pregos para subsanar estes erros, do que se dará a oportuna publicidade a través da plataforma de contratación da Xunta.  

A Consellería de Educación licitou en decembro o transporte escolar nas rutas que lle corresponden, o 47% do total. Trátase dun proceso de gran complexidade técnica con 1.574 rutas en 424 centros de ensino, divididas en 57 lotes, cun importe de máis de 81M€. A paralización do proceso non afecta á prestación do servizo neste curso. 

Concello de Folgoso do Courel

A alcaldesa do Concello de Folgoso do Courel, Lola Castro, agradece que a Xunta atendera as reivindicacións trasladadas desde o Goberno local e a comunidade educativa en relación coa proposta para o transporte escolar. Lola Castro asegura que o modelo proposto inicialmente era prexudicial para os taxistas que fan o servizo e tamén para os escolares, que se ían ver afectados.

Precisa que o de hoxe é o primeiro paso e que o Concello de Folgoso do Courel se compromete a participar nas reunións de traballo que organice a Consellería neste novo período que se abre para que se atendan todas as alegacións presentadas e se poida manter o servizo tendo en conta as condicións especiais que presenta o municipio.