Os pacientes con Covid-19 hospitalizados en Unidades de Coidados Intensivos (UCI) volveron a incrementarse ata os 193, tras superar este mércores (178) o pico máximo rexistrado en Galicia na primeira onda (177 notificados o 4 de abril), mentres que os contaxios diarios baixaron a 1.468 –uns cen menos que a xornada a anterior.
Na área de Lugo baixa nun ata os 57 os pacientes noutras unidades con Covid e mantéñense en 15 os ingresados en UCI. Neste contexto, o centro de saúde de Sarria acollerá desde este venres pola tarde a realización dos test de antíxenos ás 1.500 persoas que se citarán nos próximos días para realizar o cribado.
Citarase ás persoas por SMS para realizar unha media de 120 probas diarias. As persoas invitadas teñan entre 30 e 60 anos, exclúense os que están en confinamento ou xa fixeron a PCR porque o obxectivo deste cribado é detectar asintomáticos positivos.
Ramón Ares explica que se fai en Sarria porque se están escollendo para estas probas os concellos nos que está aumentando de forma importante a incidencia acumulada, “en función da dispoñibilidade de equipos irémonos achegando aos concellos onde temos capacidade loxística e a necesidade epidemiolóxica así o aconsella”. No concello de Sarria véñense de comunicar 7 novos contaxios na residencia Nosa Señora do Carme.
Estes cribados poboacionais forman parte da estratexia para cortar as cadeas de transmisión nesta pandemia. Tamén en Quiroga comeza o cribado na vindeira semana.
