O xerente da EOXI, Ramón Ares, acaba de anunciar este xoves, 4 de ferebeiro, que o SERGAS desenvolverá en Monforte, ademais do cribado do municipio de 4.500 persoas; un cribado a todo o persoal do IES Río Cabe, que recentemente presentaba un alto número de positivos.
As probas no IES Río Cabe faranse este sábado pola mañá no polideportivo e no ximnasio do instituto en colaboración co centro. Realizaranse PCRs para mostras nasofarínxeas a case 450 persoas entre alumnos e profesores. Os resultados que se coñecerán 48 horas despois comunicaranse aos casos positivos para que inicien corentena.
O cribado que se fará á poboación do municipio terá lugar entre as 9.00 e as 19.30 deste venres e deste sábado. As 4.500 persoas citadas recibirán o material e as explicacións para realizar unha PCR de mostras de saliva. As probas deberanse facer o domingo, 7 de febreiro, ao se levantar e sen almozar, para entregalas de novo, na área habilitada para o cribado na Pinguela, o domingo entre as 9.00 e as 12.00 da mañá.
As persoas de Monforte de entre 20 e 60 anos que teñan recibido por SMS a invitación para participar no cribado terán que presentarse na área habilitada na Pinguela no día e hora sinalados. Aquí, persoal do Hospital de Monforte e do HULA, organizados en 4 equipos, irán atendendo aos citados para informarlles dos pasos a seguir. Estímase que se adicará un minuto e medio a cada persoa de cara a poder atender ás 4.500 persoas invitadas.