A Federación de Atención á Cidadanía da USO-Galicia considera un “verdadeiro despropósito” que, tendo xa publicado a Academia Galega de Seguridade Pública (AGASP) no DOG do 20 de xaneiro, a data do primeiro exercicio do proceso selectivo, para o próximo 26 de febreiro, o Concello de Monforte de Lemos establecese, o pasado 9 de febreiro, a mesma data para iniciar tamén as súas probas a Policía Local.
FAC-USO Galicia denuncia que esta coincidencia na data de inicio do proceso de selección afecta a máis de 280 opositores aos corpos de Policía Local, que xa abonaron as súas taxas para estes procedementos, “e ven frustrados todos os seus esforzos preparatorios ao ser convocados o mesmo día.”
FAC-USO Galicia enviou un escrito dirixido ao Concello de Monforte de Lemos solicitando que modifique a data de exame, para que os afectados poidan examinarse nos dous procesos selectivos e non limitar aos opositores o dereito de acceso por quenda libre aos corpos da policía local.
