A subdelegada do Goberno, Isabel Rodríguez, informa de que Adif ten sometido a información pública, a efectos da declaración da necesidade de ocupación, un dos proxectos que vai executar para mellorar o treito Monforte-Ourense. Trátase do proxecto de tratamento de elementos da infraestrutura (pontes, túneis e explanacións) entre os ppkk 019+798 e 028+183 do treito Monforte-Ourense da liña 810.

A relación de bens e dereitos afectados, que pertencen aos concellos de Pantón e A Peroxa, foi publicada no Boletín Oficial do Estado do día 19 de febreiro.

Ademais, a documentación de expropiacións pode examinarse nas Subdelegacións do Goberno de Lugo e Ourense, na Subdirección de Infraestrutura e Vía de Adif nos concellos de Pantón e A Peroxa e tamén no apartado de Información Pública do Portal de Transparencia da web de Adif.