As actuacións consistiron na mellora do campo da festa da parroquia de Reiriz e no acondicionamento dunha pequena área de lecer na zona colindante coa estrada da Besta (parroquia de Vilelos). Os traballos foron cofinanciados pola Administración autonómica -que aporta un 70%- e o Concello no marco do PlanHurbe, que ten por obxecto apoiar ás entidades locais na execución de actuacións que contribúan a crear, mellorar ou humanizar espazos de uso público.
Así, unha parte do campo da festa de Reiriz pavimentouse cunha soleira de formigón e instaláronse bancos. Pola súa banda, na Besta actuouse nun terreo que linda coa estrada e que, tras varias intervencións para ensanchar a vía, estaba sen pavimentar e supoñía un problema de salubridade para a veciñanza. Ademais de canalizar as augas pluviais, dotouse este lugar dun pavimento de formigón con areas pardas para facelo máis estético e colocáronse bancos e cinco aparellos de exercicio biosaudable.
O delegado da Xunta destacou que as obras permitiron por un lado “recuperar un espazo degradado para convertelo nunha zona rexenerada a disposición da cidadanía”, e polo outro “mellorar a situación do campo da festa de Reiriz, un espazo de celebración e convivencia para os veciños e veciñas desta parroquia”.