Este luns, 8 de marzo, o Concello de Monforte abre prazo para confeccionar unha lista de veciños interesados en acceder a este “Programa de Compostaxe de residuos orgánicos do Concello de Monforte” en colaboración con SOGAMA, polo que se entregarán gratuitamente 100 composteiros.
“As persoas interesadas terán que dirixirse ó Rexistro Xeral do Concello e solicitar o modelo de instancia a cubrir, que tamén se poderá descargar a través da páxina web”, explica o mandatario local, José Tomé. O prazo para presentar a solicitude estará aberto ata o venres 26 de marzo.
Para optar a un composteiro, os solicitantes deberán ser cidadáns censados en Monforte, e á hora da distribución o persoal técnico da Concellería de Medio Ambiente priorizará que os demandantes teñan a súa finca ou xardín no núcleo urbano de Monforte, e que non recibiran un composteiro a través de campañas deste tipo que anteriormente organizara o Concello.
Tamén teranse en conta outros aspectos como número de habitantes da unidade familiar, extensión da finca á que se destina o composteiro, hábitos de consumo, etc. Estes datos, serán aportados polo demandante do composteiro, no momento en que cubran o formulario de solicitude que terán que presentar para elo.
As persoas que finalmente accedan ó programa de compostaxe deberán participar nunha charla formativa na que se lles explicará como utilizar axeitadamente o composteiro, a fin de reducir os restos orgánicos xerados nos fogares e obter un compost natural. Ao remate desta acción formativa recibirán o correspondente composteiro, polo que será necesario asistir á mesma para poder recollelo. Os participantes neste novo programa de compostaxe do Concello disporán dun servizo de asesoría permanente no teléfono 628 115 309.