O alcalde de Sarria, Claudio Garrido, confirmou a existencia dun novo gromo de coronavirus, focalizado neste caso nunha familia que vive no centro urbano da localidade, aínda que os adultos “traballan nunha granxa” situada nunha das parroquias rurais do municipio.

O rexedor local precisou que os membros desa familia “levan anos traballando” nesa explotación, de modo que o Sergas tomou a decisión de realizar un cribado na “aldea” na que está situada a granxa. Ademais, tamén se efectuarán probas entre os veciños do edificio de Sarria no que vive a familia para descartar posibles contaxios.

Garrido aclarou que se trata dun gromo “moi localizado”, polo que confía en que o traballo das autoridades sanitarias evite que se propague. De momento, deron positivo unhas cinco persoas, aínda que non se descarta a aparición de novos casos nos próximos días.