A pasada semana a corporación municipal aprobaba en sesión plenaria o inicio do expediente de expropiación de terreos para a construción dun cemiterio municipal de Quiroga.
Todos os grupos con representación municipal votaron a favor do inicio deste proxecto, non obstante o BNG, quixo deixar claro que había que controlar o custo deste proxecto posto que o prezo dos terreos é de 111.070 €, 21.070 € máis do orzamentado.
O alcalde de Quiroga, Julio Álvarez, informou a este respecto de que xa se entrevistou coas conselleiras de Medio Ambiente, Territorio e Vivenda e de Infraestruturas e Mobilidade; ademais de co Vicepresidente primeiro da Xunta para presentarlles o proxecto e conseguir financiación. Tamén afirmou que levaba preto de dous anos agardando por unha cita co presidente da Deputación Provincial, José Tomé, para presentarlle o proxecto e que o presidente provincial aínda non lle fixara un día para celebrar o encontro.
Julio Álvarez, fíxolles unha petición aos grupos de PSOE e do BNG para que intercedan para que o presidente da Deputación de Lugo o reciba, xa que dixo “podería botarnos unha man polo menos nos 20.000 € aproximadamente (21,070€) que faltan para a compra dos terreos, posto que o proxecto é custosísimo”.
A obra do futuro cemiterio, incluíndo o cemiterio municipal e a rúa de acceso, suporía un investimento duns 650.000 euros segundo o alcalde de Quiroga, financiándose en dúas anualidades.
