O programa leva por título “Camiños de coñecemento e experiencia. Proxecto de democratización do coñecemento” e está composto por diversos seminarios formativos, totalmente gratuítos. Poderá inscribirse neles calquera persoa maior de 50 anos, sen necesidade de posuír ningunha formación previa específica.
O Alcalde, José Tomé Roca, salienta que “trátase dun programa, que xa celebramos o pasado ano cun gran éxito de participación, co que garantimos o dereito de todos os cidadáns ó acceso a educación superior independentemente da súa idade, xénero, domicilio ou recursos. Polo tanto, entendemos a través deste proxecto favoreceremos o achegamento do coñecemento á poboación maior do noso Concello, o que incidirá na mellora da súa calidade de vida e a súa participación social real nos ámbitos rural e urbano”.
As persoas interesadas poderán formalizar a súa inscrición na Biblioteca Municipal de Monforte (Praza de España) en horario de 9 a 13:30 e de 16 a 20 horas e cubrir o correspondente formulario de inscrición, que tamén está dispoñible na web do Concello. O prazo será do día 7 ata o 16 de abril, ambos incluídos.
O obxectivo principal deste programa é favorecer a democratización do coñecemento, potenciando e difundido o coñecemento científico e artístico a toda a poboación maior de 50 anos nos concellos que se suman a este proxecto. Para elo, desenvólvense accións específicas que se concretan en varios obxectivos específicos:
- Revalorizar e profundar no valor do noso patrimonio.
- Concienciar, ensinar e aprender da presenza da ciencia no día a día das nosas vidas.
- Recoñecer o valor das disciplinas artísticas nas nosas emocións e vivencias.
- Adaptar e coñecer as competencias sociosanitarias dos principios de envellecemento activo.
- Acadar unha mellora da calidade de vida, do benestar e da participación a través do exercicio intelectual que require este tipo de formación.
Programa “Camiños de coñecemento e experiencia 2021” en Monforte
O programa de seminarios e activades prácticas desenvolverase no Centro Cívico de Monforte (Paseo do Malecón) do 20 ó 30 de abril de 2021. Dito programa contará coas seguintes actividades teóricas e prácticas:
-Seminario: “Especies invasoras” 20/04/2021 16:30-18:00 h.
Impartido por Teresa Rodríguez López, profesora titular da Facultade de Veterinaria do Campus de Lugo.
–Saída polos arredores de Monforte de Lemos e a Ribeira Sacra. 21/04/2021 16:30-18:00 h.
Dirixida por Teresa Rodríguez López, profesora titular da Facultade de Veterinaria do Campus de Lugo e por Emilio Carral Vilariño, profesor titular da Escola Politécnica Superior de Enxeñaría (USC)
–Seminario: “Das mouras ás mámoas, das mámoas ás pedras sacras, das pedras sacras a troques douro… Do inmaterial ao material do patrimonio cultural de Monforte de Lemos” 22/03/2021 16:30-18:00 h
Impartido por Carolina Casal Chico, doutora en Arte Medieval.
–Seminario: “Cultura Folclore e educación: Construíndo a Identidade Persoal desde a Tradición”. 23/04/2021 16:30-18:00 h
Impartido por Alexandre Sotelino Losada, doutor en Ciencias da Educación e docente do Departamento de Pedagoxía e Didáctica da USC.
– Visita ó Ecomuseo Pazo de Arxeriz 29/04/2021 16:30-18:00 h
Dirixida por Carolina Casal Chico, doutora en Arte Medieval.
–Obradoiro: “A Cociña Musical: O uso dos recursos cotiás na creación artística”. 30/04/2021 16:30-18:00 h
Impartido por Sandra González Sousa e Cristina Calle Rodríguez, monitoras e dinamizadoras culturais.
