Ao longo de varias xornadas, este grupo de voluntarios ambientais retirou xa máis de 600 kg de residuos que segundo dín, “ata ese momento estaban ensuciando e contaminando un dos valores máis importantes que temos na nosa cidade, o noso querido río Cabe.”

Aseguran que o maior número destes residuos correspondía a toalliñas, “que se chegaron a contar por milleiros, pero tamén é certo que nestas batidas os nosos compañeiros chegaron a atopar lixo de todo tipo: dende lámpadas a táboas de pranchar, pasando por centos de prendas de roupa.”

Desde a plataforma Salvemos o Malecón lamenta que ningunha administración se preocupe da limpeza e da saúde do Cabe, cando é un dos elementos máis fermosos da cidade “e que aportan valor engadido á nosa contorna, e teña que depender da labor dun grupo de voluntarios a limpeza e conservación do mesmo. Esta situación cobra especial relevancia se temos en conta que se trata dunha zona de especial conservación (ZEC) dentro da Rede Natura 2000 á que se lle deben aplicar medidas especiais de conservación e protección dos hábitats.”

Desde a plataforma aseguran querer axudar a concienciar á xente sobre a importancia da responsabilidade individual na defensa e coidado do noso patrimonio “e do importante que resulta o respecto polas normas básicas de convivencia, pois é traballo de todos e todas manter limpo o noso río e a nosa cidade.”