A maioría dos industriais locais que solicitaron as axudas convocadas pola Xunta de Galicia para axudar á hostalaría e á restauración, terán a maiores un complemento como axuda do Concello de Quiroga. Serán preto dunha trintena os establecementos – os que cumpren cos parámetros marcados na normativa da Xunta de Galicia – os que reciban este complemento de 1.000 €.
Con esta nova axuda o Concello de Quiroga pretende, en palabras do rexedor local, Julio Álvarez, apoiar a un sector estratéxico que serve para manter a economía e a paz social do municipio.
Esta axuda económica forma parte do I Plan de Axudas do Concello de Quiroga para traballadores autónomos e empresarios que tiveron que pechar os seus negocios e empresas afectados pola crise da COVID-19. A primeira parte deste plan consistiu na exención do pago do recibo da auga e lixo do primeiro trimestre do 2021 a aqueles establecementos que tiveran que pechar polas medidas sanitarias da pandemia.
A segunda parte deste plan municipal, a parte económica, son os 1.000 € que recibirá cada establecemento tras a firma do convenio con Vicepresidencia.
Respecto desta medida que chega agora, os dous partidos da oposición, PSOE e BNG, lembran que durante os meses de pandemia xa propuxeron en diferentes ocasións axudas directas á hostalería ao Goberno Municipal.