Entre os puntos da orde do día da sesión plenaria do pasado venres 7 de maio no Concello de Quiroga, un deles foi a renuncia por parte do alcalde, Julio Álvarez, á retribución pola súa dedicación exclusiva.

Esta renuncia, acordada na Xunta de Goberno Local e proposta na comisión informativa, foi votada a favor por unanimidade no Pleno.

Outro dos temas a tratar foi o da modificación das bases de execución do orzamento para 2021, no referente ás asignacións por asistencias a órganos colexiados, que na comisión informativa propuxérase subilas a 300 euros.

Este tema quedou retirado do pleno porque se admitiu unha moción urxente presentada polo Partido Popular na que se propoñía cambiar a asignación por asistencia dos concelleiros/as aos órganos colexiados e modificar o Regulamento Orgánico sobre asistencia ás Comisións de Delegados todos os venres de cada mes. A proposta consistiu en fixar unha asignación de 150 € pola asistencia a cada órgano colexiado coa limitación de que os concelleiros/as que forman parte da Xunta de Goberno e Comisión de Delegados cobrarán unha sesión por semana mentres que o alcalde cobrará todas as asistencias aos órganos colexiados que asista. Na mesma moción do PP propoñíase crear unha dedicación parcial e temporal para a atención do medio ambiente. A moción saiu adiante cos votos do PP e os votos en contra de PSOE e BNG.

O Pleno aprobou tamén o regulamento para a utilización do futuro Cemiterio Civil Municipal e o cambio de uso dotacional dos terreos onde se vai levar a cabo esta construción.

A sesión plenaria pechábase coa aprobación do convenio con Vicepresidencia e Consellería de Presidencia, Xustiza e Turismo para axudar aos autónomos e pequenas empresas que tiveron que pechar o seu negocio con motivo das medidas sanitarias. Coasinatura deste convenio, estes empresarios locais recibirán unha axuda de 1.000 euros que complementará as axudas que perciban da Xunta de Galicia e que forman parte do I Plan de Axudas do Concello de Quiroga.

Dentro deste plan, autónomos e empresarios quedaron libres do pago do recibo da auga e lixo do primeiro trimestre do 2021.