Sarria é unha vila unida á tradición xacobea ao ser atravesada polo Camiño de Santiago Francés, itinerario declarado como “Ben Patrimonio da Humanidade” pola UNESCO.
Atópase a 111 quilómetros de Santiago o que lle outorga un atractivo importante para comezar aquí a peregrinación a Compostela. Trátase dun punto válido para comezar o camiño a pé, xa que a distancia mínima para obter a Compostela son 100 quilómetros.
Alfombristas de Ponteareas –unha das vilas de Galicia onde máis se vive esta tradición da arte efémera–, e doutras vilas de Galicia, achegaranse ao Concello de Sarria o 12 de xuño para facer unha alfombra dentro do proxecto denominado “Alfombras para o Camiño”; unha iniciativa coa que se queren poñer en valor os diversos camiños que levan a Santiago de Compostela.
A forma de desenvolver este proxecto consiste en elaborar unha alfombra floral en diferentes vilas de Galicia por onde pasa algún dos Camiños de Santiago oficiais e conta co apoio económico da Xunta de Galicia a través de “O teu Xacobeo”, un programa de axudas específicas para a dinamización sociocultural do Camiño Santiago e a promoción do Xacobeo 2021-22.
Así, pois, alfombristas de Ponteareas e outras localidades farán parada en Sarria este sábado, día 12 de Xuño, para realizar una mosaico floral onde a Igrexa de San Salvador de Sarria, na rúa Maior. A alfombra reproducirá motivos sacados do Claustro do Mosteiro da Madalena e o escudo da Orde da Mercé.
