O concello publica nas súas redes sociais que o día 5 de agosto, a Xunta de Goberno Local tratou o escrito das veciñas e veciños do Concello de Chantada afectados directa ou indirectamente pola construción da liña de alta tensión para a evacuación do Parque eólico do Maxal. Nesta Xunta de Goberno, infórmase aos veciños de que no Concello non consta información sobre esta liña. Unicamente consta a comunicación e resolución para a realización da prospección arqueolóxica para a liña eléctrica 132KV PE Parado Vello-SE Maxal-SE Belesar (Chantada, Taboada, Rodeiro; Lugo e Pontevedra).
O día 26 de agosto mantívose unha xuntanza cunha representación das persoas afectadas. Nesta xuntanza, o Alcalde fixo fincapé na inexistencia de documentación no Concello que fixera referencia a esa liña e que, polo tanto, non eran coñecedores nin do trazado da mesma. Manuel Varela dixo que era necesario coñecer o proxecto que indicara o paso da liña, antes de que unha empresa se dedique a negociar coas veciñas e cos veciños de Chantada. Neste caso, trátase da empresa ALDICA 2015, SL que parece pertencer á empresa promotora do parque, o grupo Galenergy segundo informa na tarxeta que deixa nas casas que visita.
O Alcalde comprometeuse a informar ás veciñas e veciñas sobre calquera novidade que chegara ao Concello respecto a esa ou outras liñas de evacuación e, no momento no que estivera o proxecto dispoñible, estudalo e presentar alegacións para minimizar o impacto destas liñas no Concello, sobre todo tendo en conta que temos dúas subestacións e que existen moitos proxectos de parques eólicos que poden evacuar no noso Concello aínda que estean lonxe: temos o exemplo da construción da liña de 20 quilómetros de lonxitude para enlazar os parques eólicos Serra das Penas e Paradela con subestación de Chantada que se rematou fai pouco e a do Parque Eólico da Picota que, en principio, tamén viña á subestación de Chantada. É necesario, polo tanto, saber que liñas están previstas porque hai parroquias que están xa rodeadas nestes momentos por torres de alta tensión. O Concello solicitará información á Consellería competente sobre as liñas de alta tensión e parques eólicos que poden incidir no termo municipal de Chantada
