O servizo de madrugadores é unha proposta do Concello do Incio pensada para axudar ás familias que queiran deixar aos seus fillos cedo, antes do inicio da xornada lectiva.
O servizo, de carácter gratuíto, comeza ás 8:00 da mañá e esténdese ata as 10:00 horas, momento no que comezan as clases. Durante estas dúas horas os nenos e nenas están acompañados dunha coidadora no salón de actos do centro, o que permite cumprir con todas as medidas sanitarias en vigor. Na sala teñen diversos xogos e abundante material para poder entreterse.
O Goberno local anima aos pais e nais a interesarse polo servizo de madrugadores, xa operativo, a través do Concello ou no propio CEIP Ricardo Gasset, onde poden formalizar a súa inscrición.