O director da Fundación Colexio Nosa Señora da Antiga, P. Javier Agudo, e o director da Fundación Iberdrola España, Ramón Castresana, asinaron o convenio este luns, 29 de novembro, nun acto que tamén contou coa presenza do presidente da Fundación Iberdrola España, Fernando García Sánchez; o alcalde de Monforte de Lemos, José Tomé Roca e o director do Instituto Enerxético de Galicia, Juan Rodríguez Fernández-Arroio.

A iniciativa, que forma parte do Programa Iluminacións de Iberdrola, contará cun investimento de 90.000 euros para dotar á igrexa dunha nova iluminación artística, que permitirá poñer en valor a arquitectura e os elementos artísticos da mesma.

Grazas a este convenio, a Fundación Iberdrola España instalará a tecnoloxía LED máis avanzada, que permitirá reducir o gasto enerxético e as emisións de CO2 á atmósfera, así como minimizar os labores de mantemento. O proxecto contribuirá á conservación e difusión da igrexa do Colexio, edificio catalogado como Ben de Interese Cultural (BIC).