No 2019 decidíase abrir a participación a adegueiros profesionais pero a pandemia sanitaria que impediu que se levara a cabo esta festa, fixo que aínda non se puidese materializar aquela decisión que este ano agarda facerse realidade.
A comisión organizadora do evento xa comezou a poñerse en contacto con todas as adegas da subzona Quiroga – Bibei que forma parte da D.O. Ribeira Sacra. Algunhas das adegas xa confirmaron a súa presenza na festa de exaltación dun dos produtos máis importantes do noso municipio.
“É o momento de poñer en valor esta subzona” – afirmou o alcalde de Quiroga, Julio Álvarez– “posto que produce case o 50% de todo o viño da Denominación de Orixe, tendo o maior número de hectáreas adicado a este cultivo, (soamente Quiroga, en datos do consello regulador do ano 2020, ten 238’45 hectáreas de viñedo)”.
Por diante quedan máis xuntanzas para fixar prazos e requisitos de inscricións, para falar con colleiteiros, para pechar nomes de posibles pregoeiros e para organizar as innumerables actividades que van aparelladas a unha festa tan importante para Quiroga.