Este colectivo asegura que as familias de Chantada e Carballedo están en contra da eliminación da oferta educativa de ESO e BAC no IES Val do Asma. “A Consellería de Educación actúa con maldade contra as familias dos concellos de Chantada e Carballedo. A Consellería de Educación non se dirixiu nunca ás familias, nin a través das ANPAs dos diferentes centros educativos nin a través das persoas representantes das familias no Consello Escolar do IES Val do Asma para explicar ou abordar este asunto”, sinalan.
Condenan o que califican de dano arbitrario que os responsables da administración educativa están producindo no actual alumnado de ESO e BAC do IES Val de Asma, e por tanto o sufrimentodas súas respectivas familias. “As bágoas que durante estes días derramaron boa parte do alumnado do IES Val do Asma merece a noso máis firmecompromiso na defensa dos seus dereitos. Son mozos e mozas entre 12 e 18 anos que teñen no IES Val do Asma unha familia que desexan manter,” insisten.
Lembran que o IES Val do Asma ofrece unha formación técnica e humana que é recoñecida pola comunidade educativa nos concellos de Chantada e Carballedo e consideran que pechalo sería un drama para estes concellos.
Denuncian que a Consellería de Educación pretenda trasladar ao alumnado da ESO e BAC do IES Val do Asma, un centro educativo que califican de accesible, ao IES Lama das Quendas, “que incumpre a normativa en materia de accesibilidade e eliminación de barreiras da propia Xunta de Galicia.”
Lembran que o alumnado do IES Val do Asma procedente do concello de Carballedo e de diferentes parroquias de Chantada ten servizo de comedor neste centro e que o seu traslado ao IES Lama das Quedas deixaría a estes nenos e nenas sen o servizo de comedor. E insisten en que o IES Val do Asma ten oferta educativa de Formación Profesional, o que é un valor engadido para un Instituto de Ensino Secundario. “Consideramos que a existencia de ciclos formativos, tanto de grado medio como superior, é algo moi valioso para o funcionamento dun IES.”
Anuncian que estas demandas serán presentada ante José Luís Mira Lema, Secretario Xeral de Educación e Formación Profesional; Román Rodríguez González, conselleiro de Cultura, Educación e Universidade; e Julio Yebra-Pimental e Manuel Lorenzo Varela, alcaldes de Carballedo e Chantada, respectivamente
