O pasado 5 de marzo saía de Quiroga unha expedición dirección Ucraína cargada de alimentos e outros artículos de primeira necesidade hixiénico sanitaria coa intención de traer de volta a persoas que foxen da guerra.
A iniciativa partía de Mayte e Miguel Ángel, un matrimonio quirogués, e a ela uníronse outros catro veciños co cal a autocaravana que alugaran quedou pequena, tendo que unir ao convoi un furgón e unha pequena furgoneta con remolque.
Tras alcanzar a fronteira con Polonia entregaron os 2.500 quilos de axuda que doara a veciñanza quiroguesa e recolleron a varios refuxiados que os acompañan agora na viaxe de volta, unha viaxe duns 6.000 quilómetros. Con todo, a expedición bautizada por Mayte como “A Caravana do caracol”, chegará este venres 11 de marzo a Quiroga sobre as 14:00 h. se non hai ningún contratempo.
Veciñas e veciños da localidade, para agradecer o labor desta expedición, organizaron a través de whatsapp e redes sociais un humilde e simbólico recibimento na ponte que une Quiroga con San Clodio. Piden que a xente que se achegue leve prendas amarelas e azuis e que se amosará o apoio e benvida sen crear balbordo ou mais emoción da que poidan traer os refuxiados/as. Unha persoa quedará en Quiroga, onde ten familia, e outros irán a San Clodio, vila na que teñen unha casa cedida temporalmente por unha veciña do concello de Ribas de Sil.
