A Fundación “la Caixa” escolleu en Galicia 6 programas de Inserción Sociolaboral aos que dará financiación ata o 30/11 do 2022. Un deles é “Programa Tu Empleo”, presentado pola asociación Albores Saúde Mental.
O programa foi elixido pola súa elevada calidade técnica, destacable por estar ao mesmo nivel que os proxectos de organizacións con implantación territorial moito máis ampla e, en consecuencia, estruturas organizativas máis grandes.
Para poder participar os requisitos son: Estar en situación de desemprego ou de mellora de emprego, ter diagnosticado calquera tipo de trastorno mental (depresión, ansiedade, esquizofrenia…) e residir nalgunha das localidades seguintes: Bóveda, Carballedo, Chantada, Folgoso do Courel, Pantón, A Pobra do Brollón, Ribas de Sil, Quiroga, Monforte de Lemos, Sober ou O Saviñao.
Actividades que engloba
1. Acollida, apoio na definición, xestión e seguimento dos Plans de Traballo Individuais, facendo un acompañamento individualizado durante todo o proceso.
2. Formación e capacitación en competencias transversais (habilidades sociais, resolución de conflitos, igualdade, xestión emocional) e en competencias específicas relacionadas coa busca e mantemento do emprego (técnicas de busca activa de emprego, competencias informáticas e outras TICs, autoemprego e formación demandada polo
empresariado.
3. Información ao empresariado sobre subvencións e bonificacións, así como captación e intermediación de ofertas.
4. Apoio e acompañamento tanto na incorporación e adaptación ao posto de traballo como nos cursos de formación en outras entidades, cando sexa necesario.
5. Actividades de contacto e colaboración con entidades políticas, sociais e
administrativas, promovendo convenios de colaboración que redunden no incremento das oportunidades de emprego do colectivo.
O equipo está integrado por:
- Unha Directora do programa e Psicóloga Sanitaria, Máster en Orientación Educativa, con ampla experiencia en Inserción Laboral de persoas con enfermidade mental.
- Unha Traballadora Social Experta en Saúde Mental e Inserción Laboral de persoas con enfermidade mental.
- Unha Psicóloga Especialista en Psicoloxía Clínica (PIR) con ampla experiencia en xestión formativa e inserción laboral.
