O delegado territorial da Xunta en Lugo, Javier Arias, visitou o lugar xunto co alcalde de Quiroga, Julio Álvarez, e destacou que esta actuación enmárcase no plan Hurbe, que ten por obxectivo “a posta en valor das vilas e dos núcleos rurais contribuíndo a crear as condicións propicias para o seu desenvolvemento sostible”. Neste caso, o treito do Camiño que se reforma coincide coa rúa principal dos Novais, sumando aproximadamente 300 metros de lonxitude entre o inicio e a fin da delimitación do núcleo rural.
A intervención consistirá na mellora e embelecemento da vía, cambiando o actual pavimento de formigón por outro de formigón tratado con acabado de árido visto, que utilizará materiais de proximidade para harmonizar coas tonalidades e texturas da pedra do lugar. Na selección dos materiais tivéronse en conta tamén cuestións como a súa idoneidade para a circulación de vehículos e boa resistencia e durabilidade.
O prazo previsto de execución é de dous meses, e os traballos incluirán a vertedura do formigón in situ sobre unha superficie encofrada e o acabado texturizado que elimina a capa superior de cemento, deixando á vista os áridos. Non terá pezas nin elementos soltos, senón que será compacto, duro, estable e antideslizante en seco e en mollado.
O delegado explicou que esta actuación se desenvolve en virtude dun convenio asinado entre a Xunta e o concello de Quiroga, polo que a Administración local encargou o proxecto e a Consellería contrata e financia nun 70% a execución e a dirección das obras.
