O rexedor monfortino anima á participar na Feira Medieval a todos os monfortinos e a todos aqueles que visitan a cidade e a Ribeira Sacra nestes días e confía en ”que logo de dous anos de ausencia por mor da pandemia, este ano a Feira Medieval volverá a ser un éxito, porque a implicación da xente é máxima e porque temos ganas de recuperar as actividades propias da nosa vida normal”. Desde o concello agárdase gran afluencia de xente cunha climatoloxía moi favorable, algo que se constata na porcentaxe de ocupación de prazas hoteleiras que case chega ao 100%.

Con esta edición número 18, quedarán so dúas edicións para que a Feira Medieval de Monforte acade a declaración de Festa de Interese Turístico de Galicia.

Destacan desde o concello a alta participación nos concursos da Feira. No de traxes medievais cóntase con 20 parellas inscritas e 18 en modalidade individual. 6 locais están inscritos na modalidade de decoración de establecementos e 3 no concurso de decoración de balcóns. Para estes tres concursos, o Concello destina máis de 2.000 euros en premios. A decisión do xurado sobre os  gañadores destes tres concursos farase pública o sábado 16 de abril ás 19:30 h na Praza de España, no transcurso da propia Feira Medieval.

Espazos e actividades consolidados

O Campamento Medieval ubicado na praza de España, será un dos eixos centrais da Feira, con recreacións históricas a cargo dos Cabaleiros do Ulver, e que incluirá unha exposición de armeiros con armas de diferentes estilos, coleccións de indumentarias civís e utensilios do medievo. A actuación de xigantes, bufóns e artesáns completará a oferta de actividade na praza de España.

Ás 12 horas da mañá do sábado 16 de abril uns pregoeiros desenvolverán un espectáculo no que informarán do que acontecerá a fin de semana na cidade de Monforte, dándolle paso ó saúda do Alcalde para declarar aberta a XVIII Feira Medieval de 2022 de Monforte. Posteriormente haberá unha salva de artillería, cunha réplica dunha bombarda do século XIV, para dar inicio oficial á Feira.

Mantense unha completa Programación infantil para facer que os máis pequenos se interesen por estas celebracións medievais, ubicando o Campamento Infantil Medieval xunto ó Convento das Nais Clarisas, no que haberá diferentes xogos, obradoiros, torneos e atraccións medievais para os máis pequenos.

Consolídase a ubicación do espectáculo de aves de rapiña e cetraría coa agrupación de “Falcóns Galicia” no Campo de San Antonio e mantense un dos espectáculos máis atractivos e que gustan moito ó público, as Xustas Medievais, desenvoltas por “Hípica Celta”, no campo de terra dos Pais Escolapios. Como actividade central terán tanto o sábado como o domingo ás 18.00, un Gran Torneo Medieval, un espectáculo que incluirá variacións con respecto ós últimos anos, con rotura de lanzas, combates de espadas, nomeamento de vencedores e música ó vivo.

Este ano volverá a ter protagonismo a praza Luis de Góngora na noite do sábado 16 de abril, cun espectáculo que combina técnicas de manipulación de lume, música ó vivo, a acrobacia, a maxia e a pirotecnia fría para culminar coa queima da fachada do Pazo dos Condes de Lemos, previa á solta dos Faroliños de papel co que finalizarán as actividades do sábado.

Novas actividades

Para subir a San Vicente, este ano auméntase o número de fachos de 100 a 200, un 100% máis que na anterior edición e tamén se incrementará o número de faroliños un 150% máis, pasando de 200 a 500 unidades.

Haberá tamén un aumento dos espectáculos na rúa, en concreto, pasarán de 4 a 7 o número agrupacións musicais, o que permitirá facer 6 actuacións musicais por día, tanto para o sábado como para o domingo. E delas, dúas son agrupacións monfortinas: a Batucada de Creativa e os Xograres de Lemos, polo que dende o Concello séguese apostando polos grupos e empresas locais..

Unha das principais novidades deste ano é o Desfile do Gran Dragón, que percorrerá dende a praza de España as principais rúas da Feira e o domingo día 17 ás 9 da noite na praza Campo de San Antonio celebrarase o espectáculo “Fire Performance”, composto por música, acrobacias, bailaríns, percursionistas e manipuladores de lume, que realizarán diferentes cadros escénicos para pechar o domingo a Feira Medieval. Retómanse tame´n as comidas e ceas medievais no Parador de Turismo.

Máis de 100 postos no Mercado Medieval

Este ano contarase con 103 postos, deles, 50 son de artesanía, 34 de alimentación e 19 de comercio. Os postos de alimentación estarán distribuídos entre a venda de produtos gastronómicos que irán ubicados no interior do espazo dos mercados, o que se chama Zoco Gastronómico, e o resto das paradas gastronómicas distribuirase ó longo de todo o traxecto, sendo o zoco central destas paradas o atrio da igrexa da Régoa.