Neste encontro contouse coa presenza de asociacións da provincia de Ourense (Esgos, A Teixeira e Castro Caldelas), que estiveran ausentes na reunión de Vilachá de Salvadur. “Esta incorporación favorece á expansión desta iniciativa para organizar e coordinar as voces vivas da Ribeira Sacra”, sinala o colectivo. Por outra parte, tamén participaron novas asociacións de Pantón, Sober e Chantada.
Todos os acordos tomados foron por unanimidade. O máis importante foi a creación dunha mesa de traballo que preparará unha proposta para a constitución dunha federación de asociacións da Ribeira Sacra. “Esta decisión ten especial relevancia posto que supón un paso adiante e firme para estruturar o movemento veciñal que quere participar en todos os asuntos que lle afectan: dende a candidatura a patrimonio da humanidade da UNESCO até propor proxectos relacionados co patrimonio inmaterial, corrección de cartografía ou coñecer as liñas de subvención que favorezan á veciñanza,” aseguran.
Outros asuntos que se trataron xiraron arredor da creación de canles de comunicación, internas e externas, ou a participación como entidade propia en espazos de traballo común como poden ser os vencellados á reserva da biosfera até os GDR. “Os habitantes deste territorio teñen que ser tidos en conta por parte da Administración, establecendo un diálogo directo e frutífero para todas as partes.”
Tamén se informou na reunión que ata o de agora nin a Xunta de Galicia nin a Deputación de Lugo responderan ao documento presentado por rexistro hai 15 días no cal se expuñan distintas cuestións arredor da candidatura da Ribeira Sacra á UNESCO. Os colectivos subliñan a importancia da convocatoria urxente do Consello de Parroquias e, sobre todo, da Mesa Interdepartamental, aprobada e regulada polo decreto 105/2020 e que nunca foi convocada.
A seguinte reunión das asociacións celebrarase o 11 de xuño en Castro Caldelas para celebrar a seguinte reunión. As asociacións tamén animan a que se sumen novos colectivos veciñais, culturais e comunidades de montes para ter maior forza, poñer en común as experiencias e compartir propostas para o ben da Ribeira Sacra e da veciñanza
