A subdelegada anunciou que Adif xa formalizou o contrato, por importe de 23,8 millóns de euros, para executar obras correspondentes ao proxecto de renovación de vía do treito Ourense-Monforte de Lemos e acaba de sacar a licitación, ademais, a execución de obras dos proxectos para a supresión de catro pasos a nivel da liña León-A Coruña que están situados no concello de Lugo.
Isabel Rodríguez destacou o pulo que lle está a dar o Ministerio de Transportes á mellora das comunicacións por ferrocarril na provincia de Lugo e lembrou que, a principios deste mes, Adif adxudicou en 23 millóns de euros outro proxecto para a mellora da infraestrutura en máis de 10 km do treito Ourense-Monforte de Lemos. Nese caso, o contrato comprende o tratamento de 8 túneles, 12 pontes, un terraplén e 25 desmontes entre os puntos quilométricos 9/0059 e 19/798 da liña Monforte de Lemos-Vigo (treito Ourense-Monforte).
Renovación 46 quilómetros de vía
O contrato que acaba de formalizar Adif, adxudicado en 28.875.777 euros, é para unha actuación de renovación de 46 quilómetros da vía. Suporá a renovación de distintos elementos como o balasto e as travesas de formigón, ademais de substituír os desvíos por outros máis evolucionados e o carril existente por outro de mellores prestacións. Para executar estas obras, que teñen un prazo de execución de 23 meses, habilitase como base principal de acopio de materiais un punto no Porto Seco de Monforte de Lemos. Ademais haberá unha segunda zona de acopio, con descarreiro de balasto en Ourense e outros puntos de menos tamaño ao longo do percorrido.