En dúas semanas abrirase ao tráfico o acceso provisional a Folgoso do Courel

A Consellería de Infraestruturas e Mobilidade vén de iniciar os traballos de asfaltado da nova vía que dará acceso provisional a Folgoso do Courel como alternativa ao treito cortado da estrada LU-651, e que se abrirá ao tráfico en dúas semanas.

Nova estrada Folgoso / Delegación Territorial

O delegado territorial da Xunta en Lugo, Javier Arias, comprobou na mañá deste xoves a marcha das obras xunto coa alcaldesa, Lola Castro, e sinalou que se mantén a previsión de poñela en servizo na última semana deste mes.

O Goberno galego está a investir 917.000 euros na construción desta vía  provisional, que ten unha lonxitude de 740 metros e facilitará a circulación entre Folgoso e Quiroga. Actualmente o tráfico está desviado pola estrada provincial que pasa pola Campa e Vidallón pero non ofrece a suficiente funcionalidade, en especial para os vehículos pesados.

Nova estrada Folgoso / Delegación Territorial

Paralelamente, a Consellería está a avanzar nos traballos para definir a mellor alternativa para a restitución definitiva do treito da LU-651 que permanece cortado ao tráfico desde o pasado 20 de marzo, por mor do desprendemento rexistrado á altura do quilómetro 18 na zona de Santa Eufemia.

Ao respecto, Arias subliñou “a rapidez coa que actuou a Xunta para achegar unha resposta rápida que resolvera canto antes os problemas de conexión de Folgoso, mentres se traballa na solución definitiva”.

DEIXAR UN COMENTARIO

Please enter your comment!
Please enter your name here