Cos datos recollidos ata o de agora polo Consorcio de Turismo da Ribeira Sacra, a porcentaxe de ocupación nos aloxamentos de Ribeira Sacra no mes de xullo rozou o 72%. Nos Hoteis de 3 e 4 estrelas foi 80 %, no Turismo Rural do 73%, nas Vivendas Turísticas e de Uso Turístico do 55% e noutros aloxamentos do 80%.
Nestes datos provisionais a ocupación é un 11% superior ás previsións que os establecementos tiñan a finais de xuño. Como é habitual no verán, apenas se aprecian diferenzas na ocupación entre os días laborais e as fins de semana. A ocupación cae lixeiramente en relación 2021 e sitúase preto do ano récord en ocupación, o 2019. Os establecementos recibiron algunhas cancelacións e peticións para reducir os días de pernocta, os aloxamentos consideran que a explicación a isto está no contexto socioeconómico actual e especialmente na inflación e a incerteza que se está a estender. “Os últimos datos que se están a dar a nivel nacional recollen que un 30% dos españois cancelaron as súas vacacións nas últimas semanas e outros están a optar por retrasalas a datas con mellores prezos ou optan por aloxarse menos noites. Ribeira Sacra depende do mercado nacional, polo que esa tendencia repercute directamente”, sinalan desde o Consorcio.
As previsións de ocupación para o mes de agosto no conxunto de aloxamentos son do 73%:
* Hoteis 3 e 4 estrelas: 76%
* Turismo Rural: 88%
* Vivendas Turísticas e de Uso Turístico: 54%
* Outros aloxamentos: 75%
