A XII Feira de Artesanía e Produtos da Terra celebrarase o vindeiro domingo, día 4 de setembro, na Cruz do Incio. A cita non se conmemora desde o ano 2019 por mor da pandemia.
O día 4 de setembro ás 12:30 horas haberá un obradoiro de baile aberto a quen queira participar e ás 16:00 horas haberá xogos tradicionais e populares para nenos e maiores. Ás 17:00 horas celebrarase unha verbena dos anos 50 “como as de antes” que correrá a cargo de Oxeito na que se recrea o ambiente, a música e os bailes das verbenas en Galicia dos anos 40 e 50. A actuación conta coa colaboración da Asociación Cultural As Xeitosas do Incio. A continuación será a quenda da Charanga Ardores. Os postos de artesanía e produtos da terra estarán abertos ata a tardiña.
O alcalde, Héctor Corujo, lembra que esta feira naceu froito do entusiasmo dos veciños e veciñas por recuperar a memoria dun modo de vida, polo que convida a asistir a todos os galegos e galegas.
