Obradoiros de instalacións térmicas renovables e a súa adaptación ao sector agrario, os días 5, 8 e 9 de setembro en Monforte

A Agacal organiza no Centro de Formación e Experimentación Agraria de Monforte de Lemos tres accións de formación profesional e adquisición de competencias sobre o funcionamento das instalacións térmicas renovables, e a súa adaptabilidade ao sector agrario. Os obradoiros impartiranse os días 5, 8 e 9 de setembro, desde as 10:00 ata as 14.15 horas.

Monforte de Lemos / XdL

Os cursos inclúen nocións no relativo ao funcionamento e mantemento tanto da enerxía solar coma da biomasa. Tras isto, abordaranse a aerotermia e xeotermia das bombas de calor antes de finalizar a acción formativa cunha serie de cálculos básicos que se fan a diario nas instalacións. Estas iniciativas están dirixidas á xuventude do medio rural galego, así como ás persoas vinculadas profesionalmente, ou con expectativa de incorporación, aos sectores produtivos gandeiros, agrarios, agroalimentarios e de cadea forestal-madeira.

A Axencia Galega da Calidade Alimentaria, a través da formación non regrada e dentro do Plan de formación continua 2022, pretende que os asistentes a estes cursos coñezan o funcionamento das enerxías térmicas renovables, e a posibilidade de adaptalas ao eido agrario. Isto farase mediante a ensinanza do seu funcionamento e elementos básicos, co obxectivo de que os alumnos sexan os que valoren a capacidade de adaptación.

Nesta páxina poden atoparse os referidos cursos e facer a pre-inscrición en liña cubrindo os datos necesarios. O coordinador poñerase en contacto coas persoas interesadas a través do correo electrónico comunicándolle se están ou non admitidas. Para consultar calquera dúbida, pode chamarse ao teléfono 982 889 103, ou enviarse un correo a ceca.monforte@edu.xunta.gal.

DEIXAR UN COMENTARIO

Please enter your comment!
Please enter your name here